مغامرات جمعه فى الجامعه

[size=29]دهب .. ياقووت .. مرجان.. الماظ .. زمرد

كل الكنز اللى فى المغارة ده قدامى .. بدأت اخد بقى واحط فى جيوبى
اخيرا.. اخيرا هبقى غنى واجيب عربية بقى واجوز واعمل اللى انا عايزه
وفجأة..!!!

شميت ريحة بصل
معقوولة ايه اللى هيجيب بصل فى المغار

كان ذلك البصل ريحة الحاجة والدتى وهى جاية تصحينى من النوم وضاربة فحل بصل قد كده فى ايدها

" قوم يا منيل على عينك هتفضل نايم لحد امتى ...
قوم روح الجامعة هات النتيجة.. الواد بن ام سيد جابها ونجح وجاب جيد جدا
عايزاك ترفع راسى قدام اهل الحتة وكفاية اللى حصل السنة اللى فاتت "

خلاص يا اما هتخنق من البصل مش قااادر .. انا هاقوم اهوه ثوانى
قمت ودخلت الحمام بعد انتظار دام اكثر من نصف ساعة
لان اخويا الصغير عقبال عندكم قرر وبلا سابق انذار انه
هيستحمى النهاردة ..

دخلت الحمام من هنا .. قعدت لى يجيى نص ساعة انا كمان
معلش ياجماعة متوتر عشان النتيجة

المهم خرجت من الحمام ورحت قعدت على الكمبيوتر
قبل ما الاقى صاروخ ارض جو جاى فى نافوخى

بعد لحظات تبينت انه شبشب الحاجة والدتى
وهى تسب وتلعن فى اليوم اللى خلفتنى فيه

جرى ايه ياحاجة .. انا عملت ايه بس
قالت لى
" انت ايه اللى قعدك على المخروب ده .. انا مش قلت لك تروح تجيب النتيجة "

ياستى والله بجيبها من على موقع الجامعة
وبعد مفاوضات اكثر من ساعة وربع عشان اقنعها ان النتيجة بقت بتيجى من على النت

برضه مفيش فايدة..واخيرا حكمت المحكمة ..

قصدى حكمت امى ان انا لازم انزل اشوف النتيجة بنفسى والا....

خلاص خلاص هروح اهوه
دخلت لبست بسرعة جدا
قبل ما الفردة التانية بتاعت شبشب امى تيجى تسلم على وشى
نزلت مسربع على السلم وجرى على اول الشارع
عشان اخد الميكروباص

وانتبهت على صوت واحد بن حلال من اخر الدنيا بيقولى : اقفل السوستة يا كابتن !!

حاضر ياعم وانت لازم تفضحنى
..
قفلت السوستة وسط نظرات جميع المارين يبحثون عن تلك السوستة..
ركبت الميكروباص من هنا ولقيت التباع بدأ يكلم

رابع ورا يا كابتن
خامس ورا يا كابتن

طبعا انا مسكتش
قلت له بحده انت يا استاذ عيب كده انا طالب جامعة محترم
ولسه ماكملتش لقيت جزمة بنى ادم اتحطت فى بقى

وسمعت التباع بيصرخ

تاسع ورا يا اخوانا

العربية لسه فاضية

واخيرا وصلت الجامعة ..
نزلت من الميكروباص بكل احترام

تاكدت من ان لسه بشوف وبسمع وبتكلم
وحسست على ودانى تاكدت انهم لسه اتنين

وعديت صوابعى بسرعة كده ..
الحمد لله لسه كاملين حوالى 10 صوابع

تذكرت موضوع النتيجة
جرى على الكلية ..لقيت النتيجة ظهرت

ما بين صراخ وعويل وزغاريد وضحكات

انا رحت جرى اشوف النتيجة ملقتهاش متعلقة

رحت لعم لمعى الفراش

امال فين النتيجة يا عم لمعى
قالى ان الطلبة مكنش عاجبها النتيجة وخدوها وقطعوها

قعدت الف على صناديق الزبالة بتاعت الكلية صندوق صندوق

واخيرا فى الصندوق رقم 23 لقيت الكشف بتاع سكشنى

جابر
جمال
جمال
جمالات
جمعة

ايوه انا اهوه
لقيت الكلمة منورة
راسب وله حق الاعادة

فى ثوانى افتكرت ما فعله ابى العزيز العام الماضى

وافتكرت الاسبوعين اللى قضيتهم مجبس فى البيت

وعلطول كلمت امى فى البيت قلت لها بكل ثقة

"ايوه يا اما ... لو ابويا سأل عليا قولى له جمعة سافر موزمبيييييييييق
وابقى سلمى لى على ابن ام سيد
[/size]

ههههههههههههههههههههه
يا حرام متعثر

ههههههههههههههه
حلوة اووى

هههههههههه
جميلة يا ايناس
وشكراا ليكى اوى

شكرا ايناس على القصه

» مغامرات جمعه فى الجامعه